【小腳板 走天涯】出國留學帶唔帶電飯煲好?–留學必帶的物品清單!

pexels-photo-386009

越黎越多家長選擇送仔女出國讀書,一來係想比仔女有機會獨立生活、磨煉自己;二來外國既教育模式比較靈活,仔女可以有多啲自由發展既空間,擴闊個人眼界。

而係初次出國留學之前,屋企通常都係雞飛狗跳,好似打仗咁既款。梗係啦,人仔細細,一去就去到咁遠,屋企人都咪話唔擔心!

有人話電飯煲係留學恩物,一定要帶;又有人會帶埋枕頭被鋪同公仔;仲有人話外國野食食唔慣,要成箱公仔麵拖過去。眾說紛紜,到底留學有啲咩係必帶既呢?小編係到幫大家整理一下留學必帶既物品清單!​

外國冇得買衛生巾?電飯煲又係咪一定要帶?

1. 電飯煲?

的而且確,電飯煲真係非常非常有用!不過,電飯煲咁大舊,拎去外國真係幾論盡,電壓同香港又唔同。其實好似電熱水壺、電飯煲呢啲電器係外國都有得買,而且價格仲唔貴。強烈建議大家善用外國既網上購物平台,或者去大型超市做採購(超市都有網購網站,仲有得送貨添)。 

2. 公仔麵?食物?

有人會帶成箱出前一丁同營多撈麵,驚當地食物食唔慣。其實外國超市都有即食麵賣,不過口味就同香港好唔同,唔少人都覺得好難食。小編既建議係—係香港帶幾包就夠啦!因為當地Chinatown既中國超市好多野都有得買,好似辣椒醬、火鍋湯底、即食麵等等。雖然價錢會貴啲,不過都冇行李超重咁貴!

3. 枕頭被鋪?

如果你係住Boarding School或者大學宿舍,好多學校都會提供比你,唔需要特別帶。就算學校或者公寓真係冇提供,放心,去到都一定有得買!尤其是枕頭同被呢啲咁大型既物品,塞落喼之後真係冇位再擺野,唔建議帶埋過去。

4. 衛生巾?

有留學生聽人講話外國既女仔唔用衛生巾,剩係用棉條,所以帶左好多衛生巾去外國,望到當地超市既貨架先知被騙!雖然係國外好多人選擇用棉條,但係都有女仔選擇衛生巾,超市有琳瑯滿目既款式比大家挑選,唔使特登帶一堆過去!

5. 眼鏡?

成日都有人話留學最好帶多副眼鏡,點解呢?原來係外國配眼鏡係一件好麻煩既事,除左價錢貴之外,好似美國咁,要特登預約眼科醫生驗眼,拎到處方之後先可以配眼鏡!如果係成日打波既朋友,帶多一副會比較穩陣。

6. 文具?

留學熱門地點好似英國美國基本上係冇乜文具舖既,當地人一般都會係超市買。如果你對文具既外觀冇咩需求,帶返自己既筆袋同計數機就夠,唔需要特別買定拎過去。

7. 精神食糧?

屋企人唔係身邊,留學生有時都會思鄉同感到孤單寂寞。如果有一啲熟悉既事物,好似毛公仔、相片,或者一啲精神上既食糧,好似書籍或者港產片,都可以提供到精神上既支撐!

 

講左咁耐,到底有啲咩要帶呢?

隨身物品

■ 護照及其影印本    ■少量現金、銀行卡及其影印本 

■ 學校取錄通知書、體檢證明 (如有)、雅思/托福成績 (如有)、畢業證書 (如有)及其影印本    ■ 幾張護照規格的照片

弘海小貼士:

(1) 其他野冇帶唔緊要,可以係當地再買,但係護照唔記得就大件事,出門前一定要再三檢查清楚!

(2) 錢方面唔建議學生一次帶太多現金去,除左各地海關對入境既現金金額有限制之外,仲驚會整唔見。係留學之前可以先係銀行開設海外戶口,由父母電匯生活費,或者購買旅行支票,甚至直接帶匯票,到當地再開設戶口存入匯票。

(3) 點解以上幾樣物品都建議大家拎定影印本呢?因為萬一正本唔見左,都仲有副本可以頂住先嘛!

 

電子產品

■ ​手提電腦及耳機  ■ ​電話  ■​ 充電器  ■​​ 變壓器

弘海小貼士:

(1) 無論係讀書定係解悶,一部Notebook都係非常重要,建議選擇輕身、便於攜帶既型號。

(2) 如果屋企有多部後備電話,不妨帶多一部去,萬一唔見左電話或者電話壞左,都未至於同屋企人失去聯絡。

(3) 變壓器帶一個已經足夠,有需要可以到埗再買。如果係去英國留學,唔使帶都得。

 

衣物

■ ​T-Shirts   ■ ​​長、短褲/裙    ■ ​​厚薄外套   ■ ​​保暖內衣   ■ 冷衫   ■​ 西裝   ■​ 睡衣

 ■ ​​內衣褲、襪(最少1星期的數量)   ■ ​​ 鞋(不同類型各1對,如拖鞋、運動鞋、皮鞋)

弘海小貼士:

(1) 衫褲大概帶1-2星期左右就足夠,因為學校或者公寓都有洗衣機,每星期洗衫既話基本上唔需要太多衫。到埗後可以自己添置衣物,趁打折既時候購物仲可以買到唔少價廉物美既衫添!

(2) 因為外國既冬天比香港寒冷,所以有唔少阿媽都叫仔女帶多啲冷杉、厚䄛。不過,又唔使帶太多厚重既䄛同冷杉,兩、三件就足夠。因為外國室內都有暖氣,而且有啲地方溫差大,所以建議採用洋蔥式既著法– 即係入面著薄長袖衫或保暖內衣,甚或短袖,外加一件薄羽絨/外套,出面再著防風大衣,到陽光出黎或去室內既時候就可以除底大衣,到夜晚翻風先著返。

(3) 有時候有啲場合可能需要著正裝,例如一啲正式既晚宴或者大學conference都有機會用到

 

衛生用品及藥物

牙刷、牙膏(旅行裝)   ■ ​毛巾   ■ 刮鬍刀 (如需)

■ ​ 隱形眼鏡盒/藥水   ■ ​衛生巾(少量)   ■ ​藥物 (必理痛、胃藥、保濟丸、俄羅納英H軟膏等)

弘海小貼士:

(1) 基本上衛生用品全部都可以係當地超市買到,價格亦唔貴,除左一啲旅途上既必須品,其他都可以係當地超市買。

 

其實咁辛苦搞留學既野都係為左……

出國留學搞到好似搬屋咁,咩都想拎過去,但係抱到電飯煲又拎唔到枕頭,塞到出前一丁落喼件大衣又擺唔落,仲要驚行李超重要罰錢……

其實咁辛苦搞咁多野係為左咩姐?都只不過係希望仔女係外國可以接受到更好既教育,將來可以成才姐

我地明白出國留學從揀學校、申請入學、辦理簽證到買機票、搵住宿等程序勞心又勞力,所以我地希望幫各位心切既家長解決煩惱,協助各位學生係海外升學既道路上走得跟順順利利。

想搵人幫手搞海外留學?歡迎聯絡我地既專業顧問

我們用心,所以我們明白

 

發表迴響

你的電子郵件位址並不會被公開。 必要欄位標記為 *